“Bago pa nga lang yata ako ipanganak, planado na ng tadhana ang kapalaran nating dalawa. And here we are now.”

Tinaguriang “serial dater” si Wilma sa dami ng naging boyfriends niya. Hindi nakapagtataka iyon dahil maganda siya at attractive. Kaya never in her wildest imagination na maa-attract siya sa isang tulad ni Cenon Sizperez. Kahit pa “aging like fine wine” ang best description na maibibigay niya sa lalaki.
Ipinanganak kasi si Wilma sa panahong kasagsagan ang pagdating at pagkawala ng mga babae sa buhay ni Cenon. At ngayong nasa golden age na ang lalaki, tahimik nang namumuhay, at mukhang nagsawa na sa pakikipag-flirt sa mga babae ay saka naman siya dumating sa buhay nito.
Pareho silang aware sa matinding atraksiyon na nararamdaman nila sa isa’t isa. Kahit na pinigilan pa rin nila ang kanilang damdamin, dumating ang sandaling nagkasundo silang pumasok sa isang relasyon. Kahit alam nilang iyon ay puro problema, disapproval, panghuhusga at tsismis.
Hanggang isang araw, nalaman nilang konektado pala sila ng isang trahedya na nangyari sa nakaraan. Koneksiyon na mukhang makakasira sa kanilang nagsisimula pa lang na pagmamahalan.